माओवादी हिंसा’ शब्द नहटाएसम्म संसद अवरोध जारी राख्ने माओवादीको निर्णय

काठमाडौं ।नेकपा माओवादी केन्द्रले नेकपा एमालेका सचिव योगेश भट्टराईले संसदमा प्रयोग गरेको ‘माओवादी हिंसा’ शब्दलाई संसदको रेकर्डबाट नहटाएसम्म प्रतिनिधि सभाको अवरोध नखोल्ने निर्णय गरेको छ। आइतबार सभामुख देवराज घिमिरेले बोलाएको बैठक निष्कर्षविहीन रहँदा माओवादी केन्द्रका सांसदहरूको बैठकले यो निर्णय गरेको हो।

माओवादीले ‘माओवादी हिंसा’ शब्दलाई हटाउन आग्रह गर्दै संसदमा भएको विरोध हिंसा शब्दसँग मात्र सीमित नभएर सशस्त्र संघर्षलाई नै असर पुर्‍याउने गरी बोलेकोमा आपत्ति जनाएका छन्। यसअघि भदौ १२ गतेको प्रतिनिधि सभा बैठकमा एमाले सांसद योगेश भट्टराईले यो शब्द प्रयोग गर्दा माओवादीको विरोधका कारण बैठक स्थगन भएको थियो।

माओवादीले यस विषयमा थप छलफलका लागि एक घण्टाको समय माग्दै संसदको अवरोध नखोल्ने आफ्नो अडान कायम राखेको छ।