कटुवाचौर बजारमा आगलागी, नौ घरपसल जलेर नष्ट

दोलखाको कालिञ्चोक गाउँपालिका वडा नं. ९ स्थित कटुवाचौर बजारमा भीषण आगलागी हुँदा नौ घर जलेर पूर्ण रुपमा नष्ट भएका छन् । बुधबार राति करिब ११ बजेदेखि रुद्र बहादुर ओलीको घरबाट सुरु भएको आगलागीबाट नौ घर तथा पसल जलेर नष्ट भएका हुन् । आगलागीबाट दुर्गा दहाल, सन्तोष सेढाई, स्वस्तानी खड्का, चित्र प्रसाद सेढाई, शंकर ओली, पुस्कर ओली, रुद्र बहादुर ओली, राम बहादुर थामी र गोपिलाल थामीको घर जलेर पुर्ण रुपमा नष्ट भएको पालिकाका प्रमुख प्रशासकीय अधिकृत नवराज ओलीले बताउनु भयो । आगलागीबाट मानवीय क्षति भने नभएको उहाँले जानकारी दिनुभयो । आगलागीमा परी घर र पसल जलेर नष्ट भएका छन्, भने करोडौँको धनमाल, जिन्सी सामान, व्यापारिक सामान र पशुचौपाया जलेको उहाँले बताउनु भयो । प्रहरी, स्थानीय र दमकलको टोलीले राति नै आगलागी नियन्त्रण गर्ने प्रयास गरेपनि बिहानमात्रै आगो नियन्त्रणमा आएको थियो। आगलागीको एकिन कारण खुलेको छैन । घटनाको विस्तृत विवरण आउन बाँकी रहेको छ ।