शैलुङको विकासको लागि विभिन्न संरचना निर्माण

बुराम शर्मा /चरिकोट÷ –जैविक विविधताले युक्त जिल्लाकै गौरव एवमं पालिकाको पहिचान दिने ठूलो सम्पत्तिको रुपमा रहेको शैलुङको धार्मिक एवम पर्यटन प्रवद्र्धनका लागि शैलुङ गाउँपालिकाले विकासका बिभिन्न संरचनाहरु निर्माण गरेको छ । समुद्र सतहदेखि करिब तीन हजार मिटर उचाइमा रहेको शैलुङ विकासका लागि कालापानीलाई बेस क्याम्प बनाई विभिन्न संरचना निर्माण गरिएको गाउँपालिकाका अध्यक्ष भरत दुलालले जानकारी दिनु भयो । उहाँका अनुसार शैलुङले बुद्धलाई नै परिचित गराएको छ । यसलाई मध्य नजर गरी बेस क्याम्पमा ७० लाख रुपियाँको लगानीमा २५ फिट अग्लो बुद्धको स्तुपा स्थापना गरिकिएको छ । यहीँ गुप्तेश्वर महादेवको मूर्ति पनि स्थापना गरिएको छ । पर्यटकका लागि सुविधा सम्पन्न ५० जना क्षमताको गोलघर निर्माण भएको छ । यातायात सुविधाका लागि ढुङगेबाट करिब चार करोड लगानीमा सोलिङ सहितको सडक स्तरोन्नति पनि गरिएको गाउँपालिकाका अध्यक्ष दुलालले जानकारी दिनु भयो । बेस क्याम्पमा जग्गा विकास गरी व्यक्तिलाई भाडामा दिइएको छ । जसबाट यहाँ साना ठुला गरी चार वटा होटल र एक रिसोर्ट सञ्चालनमा आएका पनि उहाँले बताउनु भयो । पर्यटक सुविधाका लागि यहाँ प्र्रतिक्षालय, सार्वजनिक शौचालय पनि निर्माण गरिएको पनि उहाँले जानकारी दिनु भयो । बहुवर्षीय योजनामा बेस क्याम्प कालापानीबाट शैलुङ पैदलबाट जान यो वर्ष पाँच करोड लगानीमा तीन मिटर फराकिलो,दुवैतर्फ वाल रहेको पाँच सय मिटरको मिनी ग्रेटवाल निर्मााणाधीन अवस्थामा रहेको अध्यक्ष दुलालले बताउनु भयो ।
शैलुङ डाँडासम्म आठ कलिोमिटर दुरीबाट विद्युत् लाइन पुयाइएको छ । पिउने पानीको व्यवस्था पनि गरिएको जानकारी दिँदै उहाँले भन्नु भयो, “वाइफाईको व्यवस्था मिलाइएको छ , आकर्षक बनाउन ठूलो घण्टी पनि जडान गरिएको छ । किम्बदती अनुसार शैलुङमा आफनो जीवनकालमा गौतम बुद्धले तपस्या गरेको ठाउँ भनिन्छ ,साङले लामाले यहीँ बसेर पूजापाठ गरेकाले साङगे लुङ भनिएको यो ठाउँ अपभ्रंशबाट शैलुङ नामाकरण भएको भनिन्छ ।”