बिगुमा भलिबल प्रतियोगिता हुने

इश्वर बिश्वकर्मा /चरिकोट, –“स्वास्थ्यका लागि खेलकुद राष्ट्रका लागि खेलकुद ”मुल नारा सहित प्रथम विगु अध्यक्ष कप खुल्ला अन्तरपालिका पुरुष भलिबल प्रतियोगिता २०७८ हुने भएको छ । हिन्दु धर्मावलम्बीहरुको चाडपर्व विजया दशमी, शुभ दिपावली तथा छठ पर्वको अवसरमा विगु गाउँपालिका खेलकुद विकास समितिको आयोजनामा सिंगटी स्थित खोलिखिम चौरमा प्रतियोगिता हुने भएको हो । ्प्रतियोगिता असोज २० देखि २२ गतेसम्म सञ्चालन गरिने आयोजकले बताएको छ । प्रतियोगितामा बिजेता समुहलाई एक लाख, उपबिजेता समुहलाई ७० हजार, तृतिय हुने समुहलाई ४० हजार र सान्त्वना हुने समुहलाई २० हजार र सबै ट्रफी, मेडल र प्रमाण–पत्र प्रदान गरिने छ । उत्कृष्ट स्पाइकर, उत्कृष्ट सेटर, उत्कृष्ट सर्भर, उत्कृष्ट डिफेन्डर र उत्कृष्ट खेलाडीलाई जनही नगद ट्रफि दुई हजारसहित मेडल र प्रमाणपत्रको व्यवस्था गरिने आयोजकले जनाएको छ । जिल्ला भित्रका नगरपालिका र गाउँपालिकाले आफ्ना पालिकाभित्र रहेका खेलाडी समेटी कम्तीमा एक टिम खेलाडी खेलमा समावेश गराइदिनु हुन आयोजकले अनुरोध गरेको छ । १९ गतेसम्म टिम दर्ता गरिसक्नुपर्ने बताइएको छ ।