महिलालाई आत्मनिर्भर बनाउन तालिम

 इश्वर बिश्वकर्मा –दोलखाको जिरी नगरपालिकामा साेमबारदेखि ४५ दिने होजियारी तालिमको शुभारम्भ गरिएको छ । महिलालाई आत्मनिर्भर बनाउने उद्धेश्यका साथ जिरी नगरपालिकाको आयोजना र जिरी नगरस्तरीय महिला मञ्चको सहयोगमा तालिमको शुभारम्भ गरिएको हो । ९ वटा वडा रहेको पालिकाका प्रत्येक वडाका २–२ जना गरि १८ जनाको सहभागिता रहेको आयोजकले जनाएको छ । चन्द्र लक्ष्मी प्रजापति र राम प्रसाद वैद्यले तालिममा सहभागीहरुलाई मेशिनबाट टोपी, स्वीटर, गलबन्दी निर्माण सम्बन्धि प्रशिक्षण दिइरहेका छन् । तालिम उद्घाटन कार्यक्रममा बोल्दै नगर उपप्रमुख कृष्ण माया बुढाथोकीले व्यक्तीले चाहेको उद्यम गर्नुपुर्व सीप सिक्नु जुरुरी रहेको बताइन् । सानो लगनाीमा होजियारी उद्योग सञ्चालन गर्न सकिने र आम्दानी पनि राम्रो गर्न सकिने भएकोले यसतर्फ महिलाको आकर्षण बढाई स्वरोजगार बनाउन तालिमको आयोजना गरिएको उनले बताइन् । गाउँपालिकाका प्रमुख प्रसाशकीय अधिकृत अर्जुन गौतमले महिलाहरुको क्षमता बृद्विका लागि तालिमको आयोजना गरिएकोले तालिमबाट सिकेका कुरालाई सदुपयोग गरि सफल उद्यमी बन्न तालिमका सहभागीलाई अनुरोध गरे ।