नेबिसंघ दोलखाले गरेको रक्तदानमा कांग्रेस दोलखाका नेता तथा कार्यकर्ताले गरे रक्तदान

इश्वर बिश्वकर्मा चरिकोट, कार्तिक २९ नेबिसंघ दोलखाले गरेको रक्तदानमा   नेपाली कांग्रेसका नेता तथा कार्यकर्ताले रक्तदान गरेका छन् । नेपाली कांग्रेस दोलखाको पार्टी कार्यालय परिसरमा आयोजित रक्तदान कार्यक्रममा नेपाल रेडक्रस सोसाइटी जिल्ला शाखा दोलखाको समन्वयमा नेपाल विद्यार्थी संघद्वारा शुभदिपावलीको अवसरमा आयोजित कार्यक्रममा नेपाली कांग्रेसका १६ जना नेता कार्यकर्ताले रक्तदान गरेका हुन् । कोरोना भाइरसको कारण रक्तदान कार्यक्रमको आयोजना नहुँदा रगतको अभाव रहेको छ । यहि समस्यालाई मध्यनजर गर्दै ‘ रक्तदान, जीवन दान’ भन्ने मुलमन्त्रको साथ कोही पनि रगत अभावमा नपरुनु भन्ने उद्देश्यले रक्तदान कार्यक्रम आयोजना गरिएको नेपाल विद्यार्थी संघ दोलखाका अध्यक्ष भीम खड्काले जानकारी दिए । ” कोरोनाको कारण रगतको अभाव भएको छ । जसकारण सुत्केरी तथा गम्भीर चोटपटक लागेका वा अन्य बिरामीलाई रगत पाउन कठिन परेको छ । त्यस्ता व्यक्तिहरुलाई केही सहज होस् भनी रक्तदान कार्यक्रम आयोजना गरेका हौं ।” अध्यक्ष खड्काले भने । दोलखाका प्रमुख जिल्ला अधिकारी रमेश शिवाकोटीको प्रमुख आतिथ्यमा आयोजित रक्तदान कार्यक्रममा नेपाल रेडक्रस सोसाइटी जिल्ला शाखा दोलखाका सभापति गोकर्ण प्रसाद पोखरेल र नेपाली कांग्रेसका नेता तथा कार्यकर्ता एवम् नागरिक समाजका अगुवाहरुको सहभागीता रहेको थियो ।