शैलुङद्वारा बागमती प्रदेशका योजना आयोगका कार्यवाहक उपाध्यक्ष बस्नेतसँग भिडियो वार्ता

ईश्वर बिश्वकर्मा
चरिकोट, बैशाख १७
दोलखाको शैलुङ गाउँपालिका जनप्रतिनिधिले बागमती प्रदेशका निती तथा योजना आयोगका कार्यवाहक उपाध्यक्ष श्याम कुमार बस्नेतसँग एकीकृत भिडियो संवाद गरेका छन् ।
पालिकामा कोरोना भाइरस रोकथाम र नियन्त्रणका लागि भएका कार्य र विकास निर्माण बारे जानकारी दिन मंगलबार दिउँसो साँढे ३ देखि साँढे ४ बजेसम्म १ घण्टा भिडियो संवाद गरेका हुन् ।
भिडियो संवादमा ८ वटै वडाका वडाध्यक्ष, पालिका उपाध्यक्ष लालमाया योन्जन, प्रमुख प्रशासकीय अधिकृत रामकुमार महत्तो र अध्यक्ष भरत दुलालले पालिकामा कोरोना नियन्त्रणमा भइरहेको प्रयास तथा विकास निर्माणको विषयमा जानकारी आयोगका कार्यवाहक उपाध्यक्ष बस्नेतलाई दिएका छन् ।
भिडियो संवादमा गाउँपालिमा सबै वडा कार्यालय र स्वास्थ्य संस्थामा हात धुने व्यवस्था गरिएको, कोरोना भाइरस नियन्त्रण र रोकथामका लागि ३० लाखको कोष खडा गरिएको जानकारी दिएका छन् । ३० बेडको क्वारेन्टाइन निर्माण गरिएको र अब थप ४ बेड थपिने, एम्बुलेन्स तयारी अवस्थामा राखिएको, स्वास्थ्य संस्थामा उपकरण तथा सुरक्षाका सामग्री उपलब्ध गराइएको, अन्य जिल्लाबाट पालिका भित्रिएका नागरिकको स्वास्थ्य परीक्षण र अवस्था लगायतको विषयमा जानकारी दिइएको गाउँपालिकाका प्रवक्ता एवं वडा नं ४ का अध्यक्ष भरत ढूङ्गेलले बताए । कोरोना रोकथाममा आगामी योजना तथा कार्य, विकास निर्माणको अवस्था, योजना लगायतको विषयमा बस्नेतलाई जानकारी दिइएको उनले बताए । लकडाउन लम्बिन सक्ने भएकाले अन्नबाली लगाउन मल तथा बिउको उपलब्धता, विकास निर्माणको सामग्री आयात सहज बनाई सामाजिक दुरी कायम गरि कृषि र विकास निर्माण कार्य गर्ने बारे जानकारी दिइएको छ । पालिकाका जनप्रतिनिधिबाट अहिलेसम्म गरेका कामबारे जानकारी लिएपछि कोरोना नियन्त्रणमा आगामी दिनमा गर्नुपर्ने कार्य र विकास निर्माणमा प्रदेशले सहयोग गर्ने लगायतका बारे मार्गनिर्देश गरेका पालिकाले जनाएको छ । सबैको समन्वय र सहकार्यबाट कोरोना नियन्त्रण र रोकथाम सफल हुने भएकाले प्रदेश सरकारले सहयोग गर्ने आयोगका उपाध्यक्ष बस्नेतले जनाए ।