बाल मैत्री नगर घोषणाका लागी १५ भन्दा बढी सुचक पुरा

ईश्वर बिश्वकर्मा
चरिकोट, साउन २४
दोलखाको भीमेश्वर नगरपालिकालाई बालमैत्री नगर घोषणाका लागी १५ भन्दा बढी सूचक हरु पुरा भएका छन् ।
बालमैत्री स्थानिय शासन ऐन २०६८ ले निर्धारण गरेका ३९ सुचकहरु मध्ये भीमेश्वर नगरले १५ सुचक पुर्ण रुपमा पुरा गरेको हो ।
नगरले विभिन्न वडामा ३५ जना सर्भेक्षण टोली खटाई सुचकहरु बारे तथ्याङक संकलन गरेको भीमेश्वर नगरपालिकाका प्रमुख प्रसाशकिय अधिकृत मान बहादुर खड्काले बताए ।
खड्काका अनुसार बाल बचाउका १० र बाल संरक्षणका ५ सुचक पुर्ण रुपमा पुरा गरेको नगरले तथ्याङ्क बनाएको छ । त्यसका साथै बालविकास र बाल सहभागिताका सुचकहरु पुर्ण रुपमा पुरा नभएको उनले बताए । बालविकासका ६ र बालसहभागिताका ६ सुचक गरि अब १२ सुचक पुरा गर्न विभिन्न कार्यहरु भइरहेको उनको भनाइ छ ।
नगरलाई बालमैत्री घोषणाका लागि वैशाख २५ गते बालमैत्री स्थानीय शासन नगर समन्वय समितिको बैठक बसेको थियो । उक्त बैठकले भाद्र २९ गते बाल दिवसको अवसरमा बालमैत्री नगरको घोषणाका लागी कार्ययोजना पारित गरेको थियो । बालमैत्री स्थानीय नगर समन्वय समितिका अध्यक्ष एवम् नगर प्रमुख भरत केसीको अध्यक्षतामा कार्ययोजना पारित गरेको थियो ।
सो कार्ययोजना अनुरुप सुचक सर्भेक्षण, विभिन्न संघसंस्थासँग सहकार्य, समन्वय र बालक्लब गठन लगायतका कार्यक्रम गरिएको खड्काले बताए । साथै नगरले असार १० गते सम्पन्न नगर सभाबाट नगरलाई बालमैत्री घोषणा गर्न निर्णय गरेको थियो ।
बालमैत्री स्थानिय शासन ३९ सुचक पुरा गरी १६ वटा तहगत खुड्किला पार गर्ने क्षेत्रलाई बालमैत्री घोषणा गर्ने नीतिलाई ध्यानमा राखी नगरलाई बालमैत्री नगर घोषणाका तयारी तिब्र रुपमा गरिएको उनले बताए ।
बालमैत्री नगरका लागि घरपरिवार, विद्यालय, बालबालिका सँग सम्बन्धित गैरसरकारी संघसंस्था र नगरपालिका कार्यालयको शाखाहरुसँग सहकार्य , समन्वय गरि विभिन्न कार्यक्रमहरु गरिरहेको उनले बताए ।
साथै बालबालिकाको क्षेत्रमा कुल पुँजीगत बजेटको १५ प्रतिशत बजेट नगरले विनियोजन गरेको छ । ३९ सुचकहरु पुरा गर्ने प्रक्रिया, नगर स्तरीय बाल अधिकार संरक्षण तथा प्रवद्र्धन समिति गठन भई त्रियाशिल लगायतका बालमैत्री स्थानीय शासन सम्बन्धी कार्यहरु नगरले गरेको छ । बालमैत्री नगर घोषणका लागी नगरवासी उत्साहित भई तथ्याङ्क संकलनका लागी सहयोग गरिरहेको उनले बताए ।
बालबालिकाको क्षेत्रमा लगानी गर्दा बालबालिका आमाको गर्भमा हुदाँ र जन्मेपछि शारिरीक, मानसिक र बौद्धिक रुपमा विकास हुने गर्छ । सामाजिक पुँजीको निर्माण र देशको विकास गर्न बालमैत्री नगर घोषणा गर्न लागिएको उनले बताए ।
बालमैत्री स्थानीय शासन ऐनले समेटेका सुचकहरु पुरा गर्न शिक्षा, स्वास्थ्य तथा स्थानीय तहरुको महत्वपुर्ण भुमिका हुन्छ । जसमा सेवागत रुपमा २७ र संस्था गत रुपमा १२ सुचक गरी ३९ सुचक पर्दछ । यी सुचकहरु पुर्ण रुपमा पुरा भएको खण्डमा मात्र नगरलाई बालमैत्री नगर घोषणा गरिने उनले बताए । बालमैत्री नगर घोषणाका लागी नगर वासी सबैले सहयोग गर्न उनले आग्रह गरे ।