स्व. पशुपति चौँलागाई स्मृति पुरुष भलिबल प्रतियोगिताको उपाधि कालिञ्चोकलाई

चरिकोट (दीस) ः दोलखा जिल्लास्तरीय अन्तरपालिका स्व. पशुपति चौँलागाई स्मृति पुरुष भलिबल प्रतियोगिताको उपाधि कालिन्चोक गाँउपालिकाले जितेको छ । शनिबार भएको फाइनल खेलमा तामाकोसी गाँउपालिकालाई हराउदै उसले उपाधि जितेको हो । त्यसैगरी तेस्रो स्थान जिरी नगरपालिकाले हात पारेको छ । प्रतियोगितामा प्रथम हुने कालिञ्चोकले नगद १ लाख ५० हजार, द्वितिय हुने टिम तामाकोसी गाउँपालिकाले एक लाख र तृतीय हुने जिरी नगरपालिकाले ५० हजार नगद , शिल्ड, मेडल र प्रमाणपत्र हात पारेका छन् । विहिबारबाट पशुपति चौलागाईं स्मृतिको फाउन्डेशनको अयोजनामा मैनापोखरीमा उक्त प्रतियोगिता भएको थियो । प्रतियोगितामा दोलखाका १० टिमले भाग लिएका आयोजकले बताएको छ । तत्कालिन बागमती प्रदेश ख का सांसद पशुपति चौंलागार्इंको ३ बर्ष अगाडि कोभिड संक्रमणका कारण निधन भएको थियो ।