विगु गाउँपालिकामा फौजी किरा नियन्त्रण गर्न विषादी वितरण हुँदै

दीक्षण समाचार
चरिकोट, बैशाख १४
किसानहरु फौजी किराबाट पीडित भइरेको बेला दोलखाको विगु गाउँपालिकाले फौजी किरा नियन्त्रणको लागि विषादी प्रयोग गर्न किसानलाई सुझाव दिएको छ । पालिकाको वडा नं.२,३,८ मा फैलिएको फौजी किराको प्रकोपले मकै र आलु बालीमा क्षति गरेकोले किसानहरुलाई विषादी प्रयोग गर्न सुझाव दिएको हो । हुर्किदैको मकै र आलुको पात व्यापक रुपमा किराका लार्भाहरुले क्षति गरेको कृषि शाखामा किसानद्धारा गुनासो आएकोले इमामेक्टिन बेन्जोएट नामक विषादी मात्रा मिलाई छर्न सूचनामार्फत सुझाव दिइएको कृषि अधिकृत उज्ज्वल खड्काले बताउनुभयो । विषादी आवशयक परेमा कृषि शाखाबाट वितरण गरिने उहाँले जानकारी दिनुभयो । आलुबारी, मकैबारी, गहुँबारीको नियमित अवलोकन गरी किराका अण्डा, लार्भा जम्मा पारी मार्ने, निमजन्य विषादीको प्रयोग गर्ने तथा व्यापक क्षति भएको अवस्थामा इमामेक्टिन बेन्जोएट नामक विषादीको प्रयोग गर्न उहाँले अनुरोध गर्नुभयो । उक्त विषादी ५ ग्राम १६ लि. पानीमा मिसाई बिहान तथा दिउँसो २ बजे पश्चात प्रयोग गर्न सकिन्छ ।