वडाध्यक्षकप फुटबल प्रतियोगिता सुरु

चरिकोट (दीस) ः भीमेश्वर नगरपालिका वडा नं ५ मा वडाध्यक्ष कप फुटबल प्रतियोगिता सुरु भएको छ । मंगलबार बुढाभीमसेन खेल मैदानमा सुरु भएको दोश्रो जिल्लाव्यापी मावि स्तरीय छात्र फुटबल प्रतियोगिता २०८१ को उद्घाटन बागमती प्रदेशका सांसद भरत के.सीले गर्नुभएको हो । उद्घाटन कार्यक्रममा भीमेश्वर नगरपालिका प्रमुख ईश्वर नारायण मानन्धर, उपप्रमुख कमला बस्नेत, प्रमुख जिल्ला अधिकारी शिवलाल गेलाल, भीमेश्वर वडा नं २ का अध्यक्ष स्टालिन श्रेष्ठलगायतको उपस्थिति थियो । जिल्लाभरबाट २० समूहले प्रतियोगितामा सहभागिता जनाएका छन्। प्रतियोगिताको विजेताले ७५ हजार, उपविजेताले ४५ हजार, उत्कृष्ट खेलाडीले २ हजार र सर्वाधिक गोलकर्ताले २ हजार नगदसहित ट्रफी तथा मेडल प्राप्त गर्ने वडाध्यक्ष बासु श्रेष्ठले जानकारी दिनुभयो । प्रतियोगिता माघ ५ गते समापन हुने छ ।