वक्तृत्वकला प्रतियोगितामा शहीद स्मृति मावि जिरीकी मेलिसा ढुङ्गेल प्रथम

चरिकोट (दीस) ः दोलखाको चरिकोटमा शनिबार आयोजित वक्तृत्वकला प्रतियोगितामा शहीद स्मृति मावि जिरीकी मेलिसा ढुङ्गेल प्रथम हुनु भएको छ । ६० औं बाल दिवसको अवसरमा अनेरास्ववियु दोलखाले आयोजना गरेको यस प्रतियोगितामा ३३ जना सहभागि विद्यार्थीलाई  पछि पार्दै उहाँ प्रथम हुनु भएको हो ।
हनुमन्तेश्वर मावि काभ्रेका निशान्त दहाल द्वितीय, राइजिङ स्टार बोर्डिङ स्कुल चरिकोटका मिमांस न्यौपाने तृतीय, र मोडर्न नेपाल स्कुल चरिकोटकी कृष्टीका खड्का सान्त्वना स्थानमा हासिल गर्नु भएको छ । प्रथम, द्वितीय, तृतीय र सान्त्वना स्थान हासिल गर्ने विद्यार्थीहरूलाई क्रमशः ७ हजार, ५ हजार, ३ हजार, र २ हजार रुपैयाँ नगदसहित प्रमाणपत्र प्रदान गरिएको थियो । अनेरास्ववियु दोलखाका अध्यक्ष रामचन्द्र के.सीका अनुसार, प्रतियोगितामा ३३ जना विद्यार्थी सहभागी भएका थिए। विजेताहरूलाई अनेरास्ववियुका केन्द्रीय कोषाध्यक्ष संगम अर्याल र बागमती प्रदेश सांसद भरत के.सीले संयुक्त रूपमा पुरस्कार प्रदान गर्नु भएको थियो ।