बैतेश्वर गाउँपालिकामा विद्यालय बन्द गर्ने निर्णय, (क्रान्तिकारी)द्वारा विरोध

ईश्वर बिश्वकर्मा
चरिकोट, चैत्र ११
दोलखाको बैतेश्वर गाउँपालिकाको सबै विद्यालय १३ देखि १८ गतेसम्म छ दिन बन्द हुने भएको छ । शिक्षक सेवा आयोगको परीक्षामा अधिकांश शिक्षकहरु सहभागी हुने हुँदा पठनपाठन प्रभावित हुने भन्दै विद्यालय बन्द गरिएको हो । गाउँपालिकाको शिक्षा समितिको बैठकले उक्त निर्णय गरेको र सो सम्बन्धमा सूचना सार्वजनिक गरी सूचित गरिएको छ। सूचना अनुसार शिक्षक सेवा आयोगले सञ्चालन गर्ने मावि, निमावि र प्रावि तहको परिक्षामा अधिकांश शिक्षकहरु सहभागी हुने र पठनपाठनमा बाधा पुग्ने कुरालाई मध्यनजर गरी पालिका अन्र्तगत सञ्चालित सम्पुर्ण सामुदायिक तथा संस्थागत विद्यालयहरुमा वर्षे विदाबाट सोधभर्ना हुनेगरी ६ दिन विद्यालय बन्द गरिएको हो । गाउँपालिका शिक्षा शाखा अधिकृतको ऋषिराज ज्ञवालीले हस्ताक्षरित सूचना चैत आठ गते सार्वजनिक भएको थियो ।

(क्रान्तिकारी)द्वारा विरोध
अखिल नेपाल राष्ट्रिय स्वतन्त्र विद्यार्थी युनियन (क्रान्तिकारी) जिल्ला कार्य समिति दोलखाले गाउँपालिकाको शिक्षा समितिको विद्यालय बन्द गर्ने निर्णय प्रति विरोध जनाएको छ । उसले प्रेस विज्ञप्ति जारी गर्दै विद्यालय बन्द गर्ने निर्णय फिर्ता लिन माग गरेको छ। एसइइ परिक्षा नजिकीदै गर्दा केहि शिक्षक र राजनीतिक दलहरू मिलेर गैरजिम्मेवारी पूर्वक गरिएको विद्यालय बन्दको घोर निन्दा एवम भ्रत्सना गर्दै गाउँ शिक्षा समितिको सो निर्णय तत्काल फिर्ता लिन माग गरिएको हो । निर्णय फिर्ता नभए चरण बद्ध संघर्षमा उत्रने पनि अखिल क्रान्तिकारीका इन्चार्ज विशाल जिरेलद्वारा हस्ताक्षर गरिएको विज्ञप्तिमा चेतावनी दिइएको छ। लकडाउनको कारणले विगत लामो समयदेखि विद्यालय प्रभावित हुँदै आएको छ । त्यति हुँदाहुँदै अहिले बैतेश्वर गाउँपालिकामा शिक्षक सेवा आयोगको बाहना बनाउँदै विद्यालय बन्द गर्नु आपत्तिजनक रहेको भन्दै त्यसको घोरनिन्दा एवम भ्रत्सना गरिएको क्रान्तिकारीका जिल्ला इन्चार्ज विशाल जिरेलले बताउनुभयो।