निर्वाचनले रक्तदान कार्यक्रम नहुँदा रगत अभाव

दीक्षण समाचार ÷चरिकोट, ः दोलखामा निर्वाचनको कारण डेढ महिना देखि संस्थागत रक्तदान कार्यक्रम आयोजना हुन सकेको छैन । निर्वाचन अघि वार्षिक कार्यतालिका अनुसार विभिन्न संघसंस्थाले महिनैपिच्छे रक्तदान कार्यक्रम गर्ने गरेका थिए । तर निर्वाचनको बेला कुनै पनि संघसंस्थाले रक्तदान कार्यक्रम नगर्दा जिल्लामा रगत अभाव भएको छ । नेपाल रेडक्रस सोसाइटीका सभापति गोकर्णप्रसाद पोखरेलले निर्वाचनका कारण रक्तदान कार्यक्रम नहुँदा रगत अभाव हुन गई अस्पतालमा उपचारत बिरामीलाई समस्या भएको बताउनुभयो । अस्पतालमा भर्ना भएका सुत्केरी, घाइते, रक्तअल्पताका बिरामीलाई रगतको आवश्यकता पर्छ। समयमै रगतको आपूर्ति नहुँदा बिरामीको ज्यानै जाने जोखिम बढ्छ । तर जिल्लामा अहिले रगत अभावका कारण बिरामीका आफन्त भौतारिन बाध्य भएका छन् । “कार्तिकको सुरुवातमा एक पटक रक्तदान कार्यक्रम भएको थियो। त्यसपछि कार्यक्रम नहुँदा अहिले रक्तसञ्चार केन्द्रमा रगत सक्किएको हो ।“ उहाँले भन्नुभयो“ दुई संघसंस्थाले गर्ने भनिएको रक्तदान कार्यक्रम पनि निर्वाचनले स्थगित भयो । जसले गर्दा मंसिर १० गतेदेखि रगतको चरम अभाव भएको छ ।“ सभापति पोखरेलले रगतको माग आएको बेला रक्तसञ्चार केन्द्रमा रक्तदातालाई बोलाएर रक्तदान गराउने र बिरामीलाई वितरण गरिरहेको भएपनि कठिनाई भएको बताउनुभयो “ रक्तदान कार्यक्रम नभएपनि अस्पतालमा छट्पटाई रहेका बिरामीको उपचारका लागि रगत आपूर्ति गराउने प्रयास गरिएको छ ।“ उहाँले भन्नुभयो “ रगतको माग आउँदा आपूर्तिको लागि रक्तदातालाई बोलाएर रक्तदान गराउने गरिएको छ । कुनै बेला यो पनि सम्भव नहुँदा बिरामीलाई समस्या हुने गरेको छ ।“ उहाँले निर्वाचनको चहलपहल घटेपछि नियमित रक्तदान कार्यक्रमहरु आयोजना हुने र रगतको अभाव हट्ने बताउनुभयो। “निर्वाचनको चहलपहल र व्यस्तताले स्थगित रक्तदान कार्यक्रमहरु केही दिनमा हुने छ ।“ सभापति पोखरेलले भन्नुभयो “ निर्वाचनको मतपरिणाम आईरहँदा केही दिन पछि रक्तदान कार्यक्रम आयोजना गर्न संघसंस्थालाई आग्रह गरिरहेका छौं ।“ सभापति पोखरेलले मंसिर २१ रक्तदान कार्यक्रमको नयाँ बार्षिक कार्यतालिका निर्माण गरिने पनि तयारी भइरहेको बताउनुभयो।