दोलखामा “एक चिहान” नाटक प्रदर्शन गरिने

चरिकोट (दीस) ः ओजस थिएटरले दोलखामा “एक चिहान“ नाटक प्रदर्शन गर्ने भएको छ । हृदयचन्द्र सिंह प्रधानद्वारा लिखित एक चिहान उपन्यासलाई नाट्य रूपान्तरण गरी जिल्लाका तीन शैक्षिक संस्थामा प्रदर्शन गर्न लागिएको हो ।
पुस १६ देखि २१ गतेसम्म गौरीशंकर बहुमुखी क्याम्पस, जिरी मावि, र हनुमन्तेश्वर माविमा नाटक प्रदर्शन गरिनेछ । पाठ्यपुस्तकमा समावेश उक्त उपन्यासलाई नाटकको रूपमा विद्यार्थीलाई लक्षित गरी प्रदर्शन गर्न लागिएको ओजस थिएटरले जनाएको छ ।
नाटकको निर्देशन रविन दोङले गर्नु भएको छ भने नाट्य रूपान्तरण एचबी मगरले गर्नु भएको हो । सो उपन्यास कक्षा १२ को नेपाली विषयमा समावेश गरिएको छ । करिब १ घन्टा ४५ मिनेटको यो नाटक विद्यार्थीका लागि विशेष लाभदायक हुने अपेक्षा गरिएको छ ।दोलखामा नाटक प्रदर्शनका लागि रोल्वालिङ मिडिया प्रालिको सहकार्य गरिएको छ ।