तामाकोसी गाउँपालिकामा बस दुर्घटना

दोलखा, १५ फागुन । दोलखाको तामाकोशी गाउँपालिकामा यात्रुवाहक बस दुर्घटना हुँदा ८ जना घाईते भएका छन् ।

घाईतेमध्य तीन जनाको अवस्था गम्भिर रहेको छ । दुर्घटनामा परी तामाकोशी गाउँपालिका वडा नम्बर ५ शहरेकी २६ वर्षिया चन्द्रावती सुनुवार, वडा नम्बर ६ च्यामाका ७० वर्षिय कृष्ण प्रसाद फुँयाल र वडा नम्बर ५ पौवाडाँडाकी २५ वषिया गंगा सुवेदी गम्भिर घाईते भएकी हुन् । उनीहरुको अहिले किने अस्पतालमा उपचार भइरहेको दोलखाका प्रहरी प्रवक्ता प्रहरी निरिक्षक अञ्जन कोइरालाले जानकारी दिए । उनका अनुसार बस दुर्घटनामा परी वडा नम्बर ५ शहरेका गोफ्ले सार्कि, वडा नम्बर ६ च्यामाका ३४ वर्षिय नारायण श्रेष्ठ, सोही स्थानकी थलमाया फुँयाल, शहरेकी ३८ वर्षिया देवी फुँयाल र उनकी छोरी ८ वर्षिया प्रतिमा फुयाल सामान्य घाईते भएका छन् । उनीहरुको पनि किर्नेमा उपचार भइरहेको प्रहरीले जनाएको छ । काठमाडौंबाट हावातर्फ जाँदै गरेको बा २ ख ६५९८ नम्बरको बस तामाकोशी गाउँपालिका वडा नम्बर ५ शहरेको पौवाडाँडामा दुर्घटनामा परेको हो । दुर्घटना लगतै बसका चालक र सहचालक फरार रहेको र उनीहरुको खोजी भइरहेको प्रहरीले जनाएको छ । बसमा २८ जना यात्र सवाररहेको बताइएको छ । बस दुर्घटनाको कारण भने खुल्न सकेको छैन ।