आजबाट जिरीमा हेमन्त प्रधान स्मृति भलिवल प्रतियोगिता सुरु

चरिकोट(दीस)ः हेमन्त प्रधान स्मृति भलिवल प्रतियोगिता आजबाट जिरीमा सुरु हुँदै छ । हेमन्त प्रधानको २२ औं स्मृति दिवसको अवसरमा नेपाली काँग्रेस प्रदेश सभा क्षेत्र नम्बर एकको आयोजनामा सो भलिवल प्रतियोगिता आयोजना हुन लागेको हो ।
स्वास्थ्यका लागि खेलकुद राष्ट्रका लागि खेलकुद नाराका साथ आयोजना हुन लागेको बागमती प्रदेश स्तरीय पुरुष भलिवल तथा सांस्कृतिक कार्यक्रमको नेपाली काँग्रेसका सहमहामन्त्री भीष्मराज आङ्देम्बेले उद्घाटन गर्नु हुने नेपाली काँग्रेस प्रदेश सभा क्षेत्र नम्बर १ का सभापति शुक्रराज तामाङले जानकारी दिनुभयो । जिरी निवासी तत्कालिन तरुण दलका नेता हेमन्त प्रधानको द्वन्द्वकालमा माओदीको अक्रमणमा मारिनु भएको थियो ।
यसै विच आज हुने खेलको उद्घाटन गर्न बुधवार दोलखा आउनु भएका नेपाली काँग्रेसका नेता सहमहामन्त्री भीष्मराज आङ्देम्बेले सदरमुकाम स्थित पार्टी कार्यालयमा नेपाली काँग्रेसका नेता कार्यकर्तासँग भेटघाट गर्नु भएको थियो । भेटघाटका अबसरमा सहमहामन्त्रीलाई नेपाली काँग्रेस दोलखाका पार्टी सभापति बर्मा लामाले जिल्लामा पार्टी संगठनको अवस्थाबारे जानकारी गराउनु भएको थियो । आङ्देम्बेले सो अवसरमा पार्टीलाई एकताबद्ध बनाई संगठन सुदृढीकरण गर्न नेता कार्यकर्ताहरुलाई अनुरोध गर्नु भएको थियो ।