अपर तामाकोसीको कारोबार सुरु, आधारमूल्य २२४ रुपैंया

दीक्षण समाचार
चरिकोट, २९ पुस
माथिल्लो तामाकोशीको पुस २९ गते आइतबार देखि नेपाल स्टक एक्सचेञ्जमा शेयर कारोबार खुलेको छ। नेप्सेले तामाकोशीको शेयरलाई कारोबार गर्न युपिपिइआर (कारोबार संकेत प्रदान गरेको छ । यहि कोडमा अब कम्पनीको शेयर खरिद बिक्री हुनेछ ।
तामाकोशीको शेयरलाई नेप्सेले प्रतिशेयर न्युनतम ७४ रुपैयाँ ८९ पैसा देखि अधिकतम २२४ रुपैयाँ ६७ पैसा ओपनिङ्ग रेन्ज तोकेको छ । आइतबार सोही ओपनिङ्ग रेन्जको आधारमा तामाकोशीको कारोबार खुलेको हो । समाचार तयार पार्दासम्म कम्पनीको शेयर कारोबार प्रतिकित्ता २२४ रूपैयाँमा कारोबार भएको छ ।
तामाकोशीको बिहीबार नेप्सेको १० करोड ५९ लाख कित्ता शेयर सूचीकृत भएको थियो । कम्पनीले गत साउनमा आयोजना प्रभावित दोलखावासीलाई एक अर्ब पाँच करोड रूपैयाँ र गत कात्तिक १५ देखि १९ गतेसम्म सर्वसाधारणलाई एक अर्ब ५८ करोड रूपैयाँ बराबरको साधारण शेयर बिक्री गरेको थियो ।
बिक्री भएका शेयर लगानीकर्ताको हितग्राही खातामा जम्मा भइसकेको छ । दोलखावासी र आम सर्वसाधारणलाई क्रमशः १० र १५ प्रतिशत शेयर बिक्री गरेको हो ।
कारोबार सुरु भएको पहिलो दिनमै ५१ हजार ८७५ कित्ता शेयर कारोबार भएको छ । यो शेयर सर्वसाधारण समूहको मात्र हो । ३ वर्ष अघि सञ्चयकर्ता र कर्मचारीहरुका लागि बिक्री भएको शेयरको भने प्रमाण पत्र हितग्राही खातामा जम्मा भएपछि मात्र खरिद बिक्री गर्न पाइन्छ ।
दोलखाबासीको सेयर भने ३ वर्ष अझै खरिद बिक्री गर्न पाइदैन । तर हितग्राही खाता उल्लेख गरेको सेयर जम्मा हुन्छ भने हितग्राही खाता उल्लेख नगरेकाहरुले भने हितग्राही खाता राख्न सकिने अपर तामाकोसी हाइड्रोपावर कम्पनीका प्रमुख कार्यकारी अधिकृत विज्ञानप्रसाद श्रेष्ठले जानकारी दिए ।
कम्पनीले केही वर्ष पहिले नै कर्मचारी सञ्चयकोषका कर्मचारी, ऋणदाता संस्थाका कर्मचारी, सञ्चयकोषका कर्मचारी, नेपाल विद्युत् प्राधिकरणका कर्मचारीलाई शेयर बिक्री गरेको थियो । कम्पनीले दोलखाको लामाबगरमा ४५६ मेगावाट क्षमताको आयोजना निर्माण गरिरहेको छ । आयोजनाको हाल ९७ प्रतिशत भौतिक प्रगति भएको छ । आयोजनाको लागत भने दोब्बरले बढेर ६९ अर्ब ६१ करोड रुपैयाँ पुग्ने अनुमान छ ।