अन्तरपालिका शिक्षक भलिबल प्रतियोगिताको उपाधि जिरी नगरपालिकालाई

चरिकोट (दीस) ः दोलखा सदरमुकाम चरिकोटमा सम्पन्न अन्तरपालिका शिक्षक भलिबल प्रतियोगिताको उपाधि जिरी नगरपालिकाले हात पारेको छ। बिहीबार सम्पन्न फाइनल खेलमा जिरीले विगु गाउँपालिकालाई ३–२ सेट अन्तरले पराजित गर्दै उपाधि जितेको हो।

त्यसैगरी, प्रतियोगिताको तृतीय स्थान कालिन्चोक गाउँपालिकाले हासिल गरेको छ। उसले डी.एफ.सीलाई ३–२ सेट अन्तरमा पराजित गर्दै तेस्रो स्थान हात पारेको थियो।

दोलखा स्पोर्ट्स फेलोसिपको आयोजनामा भएको यो प्रतियोगितामा ११ टोलीले सहभागिता जनाएका थिए। भीमेश्वर कभर्ड हलमा सञ्चालन भएको प्रतियोगितामा प्रथम, द्वितीय र तृतीय स्थान हासिल गर्ने टोलीहरूले क्रमशः नगद ५० हजार, ३० हजार र २० हजार रुपैयाँसहित शिल्ड, मेडल र प्रमाणपत्र प्राप्त गरेका थिए।