दोलखामा न्यायिक समितिको विश्वास बढ्दै

इश्वर बिश्वकर्मा चरिकोट, –दोलखाका स्थानीय तहमा रहेका न्यायिक समिति प्रति विश्वास बढ्दै गएको छ । न्यायिक समितिमा गाउँको विवाद गाउमैं समाधान हुने र सबै पक्षको जीत हुने गरी सहज, छिटो र निष्पक्ष ढंगले न्याय पाईन्छ, भन्ने विश्वास नागरिकमा बढ्दै गएको हो । जिल्लाको बैतेश्वर गाउँपालिकाको न्यायिक समितिका संयोजक एवं पालिका उपाध्यक्ष रविचन्द्र आर्चायले न्यायिक समिति पदाधिकारीको सक्रियता र प्रभावकारी न्याय सम्पादनको कारण न्यायिक समितिप्रति जनविश्वास बढेको दाबी गर्छन् । दुबै पक्षको जीतको महशुस हुने गरी निष्पक्ष न्याय सम्पादन गरेका छौं । उनले भने अधिकाँश उजुरी उपर छलफल गरी मेलमिलापको माध्यमबाट निरुपण गरिन्छ । सोही कारण न्यायिक समितिप्रति नागरिकको विश्वास बढेको हो।  न्यायिक समिति संयोजक एवं पालिका उपाध्यक्ष आर्चायका अनुसार न्यायिक समितिको स्थापना भएपछि १ सय २८ वटा उजुरी दर्ता भएका थिए । जसमध्ये अधिकांशको उजुरी उपर छलफल गरी मेलमिलापको माध्यमबाट निरुपण गर्ने गरिएको छ । न्यायिक समितिमा दर्ता भएको उजुरी मध्ये १ सय २ वटाको मेलमिलापको माध्यमबाट निरुपण गरिएको छ । तर बाँकी केहि मुद्दाको भने न्यायिक समितिले फैसला गर्न नमिल्ने भएकोले प्रहरी र अदालती प्रक्रियामा पठाइएको छ, भने कतिपय उजुरीकर्ता सम्पर्कमै आएनन् । न्यायिक समितिको गठन भएको पहिलो बर्ष २०७४÷०७५ मै ४४ वटा उजुरी दर्ता भएका थिए । त्यसमध्ये ३६ वटाको मेलमिलापको माध्यमबाट निरुपण गरिएको न्यायिक समितिको कानुनी सहजकर्ता नविन कुमार खतिवडाले बताए । आव २०७५÷०७६ मा न्यायिक समितिमा अघिल्लो आवको भन्दा कम उजुरी दर्ता भएका थिए । उक्त आवमा ३४ वटा उजुरी परेकोमा २९ वटाको मेलमिलापका माध्यमबाट निरुपण गरिएको छ । आव २०७६÷२०७७ मा ३६ वटा उजुरी परेकोमा ३० वटाको मेलमिलापको माध्यमबाट निरुपण गरिएको र ५ वटाको भने प्रहरी र अदालती प्रक्रियामा पठाइएको छ । चालु आवको मंसीर २३ सम्म १४ वटा उजुरी परेकोमा आधा अर्थात् ७ वटा उजुरी मेलमिलापको माध्यमबाट निरुपण गरिएको कानुनी सहजकर्ता खतिवडाले बताए ।

यता जिरी नगरपालिकाको न्यायिक समितिप्रति पनि जनताको उत्तिकै विश्वास रहेको समितिले दाबी गरेको छ । जिरी नगरपालिकाको न्यायिक समिति संयोजक एवं पालिका उपप्रमुख कृष्णमाया बुढाथोकीका अनुसार न्यायिक समितिमा न्याय पाउन सहज हुन्छ भन्ने नागरिकमा विश्वास बढेको छ । जसले गर्दा गाउँमा विवाद भए न्यायिक समितिमा उजुरी पर्छ । यसले गाउँमै मिल्ने विवादको उजुरी लिएर जो–कोही पनि प्रहरी र अदालत धाउन छाडेका छन् । न्यायिक समितिको कानुनी सहजकर्ता अनिता जिरेलका अनुसार न्यायिक समिति गठन भएदेखि मंसिर २३ सम्म १ सय ४२ वटा निवेदन दर्ता भएका थिए । जसमध्ये १ सय ९ वटा निवेदनको मेलमिलापको माध्यमबाट निरुपण गरिएको छ । ७ वटा प्रहरी समक्ष र ७ वटा अदालती प्रक्रियामा पठाइएको कानुनी सहजकर्ता जिरेलले बताइन् । १९ वटा उजुरीको उजुरीकर्ता भने सम्पर्कमै आएनन् ।न्यायिक समितिमा लेनदेन, सामन्य विवाद, साँध सिमाना सम्बन्धी लगायतका विवादका उजुरी दर्ता हुने गरेका छन्