चरिकोटमा रक्तदान कार्यक्रम सम्पन्न

दीक्षण समाचार

चरिकोट, मंसिर २९

दोलखाका सदरमुकाम चरिकोटमा खुल्ला रक्तदान कार्यक्रम सम्पन्न भएको छ । नेपाल रेडक्रस सोसाइटी दोलखाको समन्वयमा पतञ्जली योग समिति, महिला पतञ्जली योग समिति युवा नेपालको संयुक्त आयोजनामा कार्यक्रम सम्पन्न भएको हो । जिल्लामा रगतको अभाव हुन नदिन “रक्तदान जीवनदान” भन्ने नाराका साथ कार्यक्रम आयोजना गरिएको पतञ्जली महिला संघकी अध्यक्ष अर्चना घिमिरेले बताउनु भयो । चुनावका कारण रक्तदान कार्यक्रमका साथै रगत संकलन कार्य प्रभावित हुँदा जिल्लामा रगतको चरम अभाव भएको पाइयो । त्यसैले यस्तो बेला सजिलै रगत उपलब्ध होस् भनेर रक्तदान कार्यक्रम गरिएको उहाँको भनाई छ । रेडक्रस सोसाइटीका सभापति गोकर्णप्रसाद पोखरेलले रक्तदान कार्यक्रमबाट २८ पिन्ट रगत संकलन भएको बताउनु भयो । संकलित रगत रक्तसञ्चार केन्द्रमा बचत गरिने र आवश्यक परेको बेला बिरामीलाई उपलब्ध गराइने उहाँले बताउनु भयो । उपचाररत बिरामीले रगत अभावमा ज्यान गुमाउनु नपरोस् भनेर जिल्लामा पुनः रक्तदान कार्यक्रमहरु आयोजना हुन लागेको सभापति पाखरेलले बताउनु भयो । “निर्वाचनको बेला राजनीतिक कार्यक्रमहरुले व्यापकता पाउँदा रक्तदान कार्यक्रमहरु भएनन् । जसले गर्दा रगत आपूर्ति कठिन भएको थियो ।” उहाँले भन्नुभयो, “अहिले भने निर्वाचन सकिएपछि रक्तदानका कार्यक्रमहरु आयोजना हुन थालेका छन् ।”